ا[اتنين متزوجين]ا – الحلقة الرابعة

قــال عمــر:
الحمد لله إني لم أتزوج واحدة مجنونة تخنقني بغيرتها وخناقها وعصبيتها .. فعلاً الثقافة والقراءة بتفرق جداً في عقلية البنت .. لو كانت سارة واحدة دماغها فاضية من بتوع الموضة والأغاني وخلاص كانت قلبت دماغي على حكاية شيرين وقلبت بوزها 6 سنين، وكل ما ح نشوف واحدة حلوة ح تبصّلي زي المخبرين في قسم البوليس لما بيصطادوا مجرم وهاتك يا تحقيق .. بجد لو كانت عملت كده ما كنتش ح احكيلها حاجة أبداً بعد كده وأريّح دماغي وخلاص .. ربنا يهديكي يا سارة وتفضلي عاقلة كده ..

قــالت ســارة:
منظر البحر ساحر والأحلى إني مع حبيبي ولا أخاف أن يراني أحد، بل بالعكس أتمنى أن يعرف جميع الموجودين على الشاطىء أني عروسة في شهر العسل من فرط سعادتي وإحساسي بالراحة .. مر عليّ أجمل أسبوع في حياتي كله، فسح وخروج وسهر وحب في حب .. مش عاوزة أبعد عن عمر ولا ثانية .. فعلا لازم يسموه شهر عسل، قصدي أسبوع عسل، بس يا خسارة ده آخر يوم ونعود إلى القاهرة غداً ..
نظرت إلى عمر فوجدته شارد يفكر .. ياترى بتفكر في مين يا عمر؟ .. في شيرين؟

مش معقول .. كفاية تفاهة بقى يا سارة وإياكي تفتحي الموضوع ده أبداً .. أنا ما صدقت إني كسبت نقطة وخليته يثق فيّ كصديقة عاقلة قبل ما أكون زوجة غيورة، بس بجد كنت ح اموت من الغيرة .. بس يعني لو صرخت وبوّزت وخاصمته ح اخليه ينسى أي واحدة ومايبصش لواحدة غيري؟ مش ممكن طبعا ده ح يبعد عني أكتر ..
لا ياسي عمر ده أنا ح اكون قدامك ووراك وجنبك وفي كل مكان حتى تحت جلدك ..

ده أنا عاملة لك حتة خطة الليلة دي، مش ح تخليك تفتكر لا بشيرين ولا سعدية، وتحلف إن مفيش فى الدنيا بنت غيري .. بس استنى عليّا ..

قــال عمــر:
المصاريف خرمت خالص يا واد يا عمر!! .. وباين علينا ح نقعد قدام المرسى أبو العباس نكمل الأسبوع .. فطار وغدا وعشا برة البيت ده غير الفسح!! ماشاء الله على الشحاتة المتوقعة .. الحمد لله إن العربية فيها بنزين ترجّعنا مصر بكرة إن شاء الله، وراجع جري على بيت السيد الوالد طبعا علشان منحة أبوية تانية .. حاجة تكسف بجد .. بس الحقيقة كان أسبوع يجنن كان نفسي يبقى شهر .. دول العزاب دول غلابة يا عم .. قال ويقول لك محلاها عيشة الحرية ..

قــالت ســارة:
أنا: إيه يا سي عمر أنا ح اموت من الجوع وانت آخر طناش .. إيه خير؟. . إنت ح تصوم الستة البيض من النهاردة؟
عمــر: يا ساتر يارب، مش أنا لسه يا بنتي مفطّرك من 8 ساعات!؟ .. ده انتي ح تاكلينا لما نروّح ..
أنا: ياباي على الغلاسة .. يابني ح اموت من الجوع، والناس اللي جنبنا دول ما بطّلوش أكل من ساعة ما وصلوا .. وحتى الست صعِبت عليها لما لقيتنا مدينها ترمس ولب من ساعة ماجينا، قامت عزمت عليّ بطبق محشي وانت بتصلى العصر .. بس أنا عملت فيها العروسة الشيك وقلت لها ميرسي ياطنط .. يا خسارة المحشي ..
عمــر: محشي؟!! .. ياريتك جبتيلنا طبقين .. دي الفلوس اللي معانا يادوب تأكّلنا كشري، واحتمال مفيش عشا كمان .. لازم يخلوا العرايس يطبخوا في شهر العسل علشان العرسان ما تشحتش ياحبيبتي ..
أنا: طيب ح نموت من الجوع ولا إيه النظام؟ .. فهّمني علشان أروح الحق طنط بتاعة المحشي بسرعة .. دول دخلوا في المسقعة ..
عمــر: لا يا ستي آخر وجبة ح ناكلها هنا وأمري إلى الله .. ح نروح ناكل في مطعم قريب من البيت، وبعدين بالليل فيه ناس قرايبنا هنا إبنهم عمل حادثة وح اضطر أروح أشوفه شوية .. تحبي تيجي معايا ولا بتخافي من المستشفيات؟
أنا: لا باخاف .. روح إنت .. وبعدين عاوزة أحضر الشنط وأنام بدري النهاردة .. معلش يا عمر لو جيت ولقيتني نايمة ما تصحّنيش علشان خاطري ..
عمـر: ياسلام؟ .. لا والله؟ كده يا سارة .. وتسيبيني أسهر لوحدي؟
أنا: معلش يا عمر بجد تعبانة وعاوزة أنام بدري .. الظاهر ح اخد دور برد .. ما تزعلش علشان خاطري ..
عمـر: لا يا حبيبتي خلاص .. أنا عاوزك ترتاحي .. بس افتكريها ..

قــالت ســارة:
اخيراً عمر مشي وراح المشوار بتاعه .. قدامي حوالي 3 ساعات علشان أرتّب أجمل ليلة ح يعيشها في عمره ..
رتبت الشنط بسرعة جداً وكلمت حلواني مشهور في اسكندرية لأؤكد حجز تورتة حجزتها من امبارح على شكل قلب احمر ومكتوب عليها اسمينا انا وعمر وعليها كلمة: إلى حبيبي .. أحبك ..
ثم أخرجت صندوق المفاجآت اللي كنت محضراه من القاهرة واللي رفضت أن يطلع عليه أحد حتى أمي .. وأخرجت منه مجموعة من الشموع الحمراء والوردية ووزعتها فى جميع أنحاء المنزل .. لن أوقدها إلا عندما يأتي حبيبي .. ومجموعة من الورود المجفّفة جميلة الشكل نثرتها على الأرضية بشكل أسهم تشير الى غرفة نومنا .. ثم مجموعة من البطاقات الوردية والملونة التي كتبت عليها عبارات غرامية إليه ووزعتها فى كل المنزل بشكل مرتب ومتسلسل .. ثم دخلت الحمام وأخذت شاور سريع .. ثم ملأت البانيو بماء ساخن ورغاوي صابون منعشة لعمر عندما يأتي، ونثرت فوق المياة مجموعة من القلوب الحمراء الطافية .. وكتبت على مراية الحمام بالروج بخط صغير: كان أجمل أسبوع عسل فى العالم ياحبيبي ..
ثم دخلت الى حجرة النوم ورتبتها ورشيت معطر جو لم أستخدمه من قبل ولم أنسى الشموع طبعاً .. ثم ارتديت طقم جديد ساحر كنت أخفيه .. ورشيت عطر رائع، وجلست أضع الماكياج بدقة شديدة وكأني سأتزوج مرة أخرى هذه الليلة .. هكذا سينسى أي إمراة اخرى سواي وليس بالنكد .. يارب ارضى عنا ..
عمر بيركن سيارته تحت المنزل، الحمد لله إننا فى الدور الخامس، أمامي وقت لبقية الخطة .. وضعت التورتة في الصالة وحولها الشموع ليراها أول ما يدخل .. ورتبت البطاقات وأغلقت أنوار الشقة كلها وتركت باب الشقة مفتوح قليلاً ودخلت أختبىء في غرفتي ..

قــال عمــر:
إيه يا سارة ده انتي نمتي وسبتي الباب مفتوح؟ .. ايه ده النور مقطوع ولا إيه؟ .. سارة .. إنتي فين؟
إيه ده إيه ده، أنا مش مصدق عيني .. الله الله لا يمكن أنا اكيد فى حلم .. سارة إنتي فين؟
إيه التورتة الرهيبة دي؟ .. يااااااااااااااه ده انا حاسس إني ملك .. ساااااااااارة ..
وإيه الكروت اللي على الأرض دي؟
أول واحد مكتوب فيه: لو كنت بتدوّر عليّا اتبع الأسهم ..
آآه ده فيه أسهم بالورود على الأرض كمان .. إيه الرقة دي؟
والكارت اللي بعده مكتوب عليه: حد يمشي ورا الأسهم برضه؟ .. إمشى ورا قلبك يا حبيبي وانت تلاقيني ..
ودخلتُ الحمام وجدته مجهز لملك أو أمير .. بجد بجد بحبك يا سارة .. إنتي فين يا حبيبتي..؟ أكيد هنا في أوضتنا ..
كمان كارت على باب الحجرة مكتوب عليه: أنا بعشق أحلى رجل في الدنيا .. هو إنت ..
وفتحتُ الحجرة لأجد سارة تنتظرنى في أجمل صورة ممكن أن أتخيلها .. أميرة نائمة وسط الشموع والورود ..
هل ممكن أن تُرضي زوجة رجلها وتسعده بهذا الشكل إلا زوجتي الرائعة و… سكت شهريار هذه المرة عن الكلام المباح ..